may kanya kanyang hinahanap

ang bawat isa sa ating mga nilalang

na malayang gumagala

sa mundong ito

mayroong naghahanap ng kayamanan

na magbibigay kaligayahan

sa pamamagitan ng pagkalap

ng mga kaariang

magsisilbing amo

dahil sa pangangalaga

na kakamtin ng mga bagay na ito

mayroong naghahanap ng pag-ibig

na syang magpupuno

sa puwang na nararamdaman

sa kakulangang nadarama ng bawat isa

ngunit kadalasan, sa ganitong sitwasyon

ang pumupuno ay ang sya ring

nagpapalawak at nagpapalalim

ng puwang na nararamdaman

mayroon ring naghahanap ng saysay

sa mundong pawang puno ng

talinghaga at kaguluhan

ngunit sa kakahanap sa mailap na

kabuluhan sa buhay na ito

kadalasa'y nalalampasan rin lang

ang mga simpleng bagay

na nagbibigay saysay

sa karamihan

ano nga ba ang dapat na hanapin?

bakit iba iba tayo ng hinahanap?

may saysay pa nga ba ang paghahanap na ito?

o nagsisilbi lamang itong pampalipas ng oras

habang nabubuhay sa kapanahunang ito?